શંભુ ચરણે પડી, માગું ઘડી રે ઘડી કષ્ટ કાપો ।

શંભુ ચરણે પડી, માગું ઘડી રે ઘડી કષ્ટ કાપો ।

શંભુ ચરણે પડી, માગું ઘડી રે ઘડી કષ્ટ કાપો ।
દયા કરી દર્શન શિવ આપો

તમે ભક્તોના ભય હરનારા, શુભ સૌનું સદા કરનારા ।
હું તૌ મંદ મતિ, તમારી અકળ ગતિ, દુ:ખ કાપો ….દયા કરી દર્શન શિવ આપો

અંગે ભસ્મ સ્મશાનની ચોળી, સંગે રાખો સદા ભૂત ટોળી ।
ભાલે ચંન્દ્ર ભર્યો, કંઠે વિષ ધર્યુ, અમૃત આપો ….દયા કરી દર્શન શિવ આપો

નેતી નેતી જ્યાં વેદ વધે છે, મારૂ ચિતડું ત્યાં જાવા ચહે છે ।
સારા જગમાં છે તું, વસું તારામાં હું, શક્તિ આપો ….દયા કરી દર્શન શિવ આપો

હું તો એકલપંથી પ્રવાસી, છતાં મારો આતમ કેમ ઉદાસી ।
થાક્યો મથી રે મથી, કારણ મળતું નથી, સમજણ આપો ….દયા કરી દર્શન શિવ આપો

આપો દ્રષ્ટિમાં તેજ અનોખું, સારી સૃષ્ટિમાં શિવરુપ દેખું ।
મારા મનમા વસો, હ્રુદયે આવી વસો, શાંતિ સ્થાપો …દયા કરી દર્શન શિવ આપો

ભોળાશંકર ભવદુઃખ કાપો, નિત્ય સેવાનું શુભ ફળ આપો ।
ટાળો માન મદા, ગાળો ગર્વ સદા, ભક્તિ આપો….દયા કરી દર્શન શિવ આપો

શંભુ ચરણે પડી, માગું ઘડી રે ઘડી કષ્ટ કાપો ।
દયા કરી દર્શન શિવ આપો